A’ dìochuimhneachadh

Dealbh: Christine Morrison

Dh’fhàg na cinn-naidheachd - cogadh, mì-chneastachd, covid, blàthachadh na cruinne - fo bhròn e.

‘Carson nach ionnsaich cinne-daonna le a mhearachdan?’ dh’fhaighnich e dheth fhèin.

Mar gun robh freagairt air èirigh bho aigeann inntinn, thàinig cuimhne air ais thuige bho làithean òige ...

Bha athair air rabhadh a thoirt dha, ‘Bidh an t-slighe cunnartach. Thoir an aire dod chasan!’

Agus a-nis bha e a’ ruith. Sìos an cas-cheum tron choille-ghiuthais. A’ cumail sùil a-mach airson nam freumhan a bheireadh air tuisleachadh. Freumhan a bha cho cruaidh, cruinn ri fèithean gobhainn, agus e a’ bualadh stàilinn dearg-lasrach na tuaighe-catha le òrd ann an sloc duaichnidh fon talamh.

A’ ruith gu luath. Cò aige a bha fhios an robh cuideigin … no rudeigin … ri feall-fhalach air cùlaibh nan craobhan.

Os a chionn, adhar gorm.

Solas na grèine a’ blàthachadh nan creagan.

A’ ruith, chan fhaca e an nathair-nimhe.

Nuair a bhuail a chas sìos oirre, leum an nathair suas mar phìob rubair, a’ cur car dhith.

Bha e an dùil ri teum ach cha do thachair e.

Cha bu dùraig dha sùil a thoirt thar a ghualainn.

Chùm e air a’ ruith sìos tron choille.

Agus sìos tro na bliadhnaichean.

A’ ruith agus a’ dìochuimhneachadh.

(Taing do Katie Cooper airson a comhairle.)